ප්‍රතිසංස්කරණය කිරීමෙන් පසු උතුරු දුම්රිය මාර්ගයේ කොළඹ කොටුවේ සිට කන්කසන්තුරය දක්වා දුම්රිය ධාවනය අද (28) සිට යළි ආරම්භ කරන බව දුම්රිය දෙපාර්තමේන්තුව පවසයි.
රජයේ ප්‍රවෘත්ති දෙපාර්තමේන්තුව නිවේදනයක් කරමින් සඳහන් කළේ මහව සහ අනුරාධපුරය අතර දුම්රිය මාර්ගයේ නවීකරණ කටයුතු අවසන් වීමත් සමග උතුරු දුම්රිය මාර්ගයේ ධාවන කටයුතු එලෙස ආරම්භ කිරීමට තීරණය කර ඇති බවයි.
මේ අනුව අද දින පෙරවරු 5.45ට සහ පස්වරු 1.45ට කොළඹ කොටුවේ සිට අනුරාධපුර සහ කන්කසන්තුරේ බලා ශීඝ්‍රගාමී දුම්රිය දෙකක් ධාවනය කරනු ලබන බවත්, හෙට දින (29) කන්කසන්තුරේ සිට අනුරාධපුර සහ කොළඹ කොටුව දක්වා දුම්රිය දෙකක් ධාවනය කිරීමට නියමිතව තිබෙන බවත් එම නිවේදනයේ වැඩිදුරටත් සදහන්.
මේ අතර උතුරු දුම්රිය මාර්ගයේ මහව සහ අනුරාධපුර කොටසේ දුම්රිය ධාවනය කරනු අවස්ථාවන්හිදී දුම්රිය හරස් මාර්ග භාවිතා කරන මහජනතාව ඉතා සැලකිලිමත්ව එම මාර්ග භාවිතා කළ යුතු බව දුම්රිය දෙපාර්තමේන්තුව පවසනලදි.
