පාසල් තුළට මත්ද්‍රව්‍ය පැමිණීම වැළැක්වීම සඳහා පොලිස් සෝදිසි කිරීමේ වැඩසටහනක් අද (13) දින කොට්ටුකච්චිය නවෝද්‍යා විද්‍යාලයේ සිදුකෙරුණි.
උදෑසන 6 සිට පාසල ආරම්භ වනතුරු පාසලට පැමිණෙන සිසු සිසුවියන්ගේ පොත් බෑග හා ඇඳුම් පරීක්ෂා කිරීම ඒ අනුව සිදුවුණි.
පාසල් තුළට පසුගිය කාලයේ විවිධ ආකාරයේ මත්පෙති හා මත්ද්‍රව්‍ය පැමිණීමත් සමග පාසල් කටයුතුවලට බරපතළ ලෙස ගැටලුකාරි තත්ත්වයක් මතුව තිබුණි.
එම කරුණු සැලකිල්ලට ගනිමින් පුත්තලම අධ්‍යාපන කලාපයේ පාසල්වලට නිල දැනුම්දීමකින් තොරව හදිසි සෝදිසියක් සිදුකර තිබේ.
ඒ සඳහා පොලිස් කාන්තා හා පිරිමි පොලිස් නිලධාරින් 30 කට ආසන්න කණ්ඩායමක් යොදවා තිබුණි.
විශ්වවිද්‍යාල පද්ධතිය තුළට විශාල වශයෙන් මත්ද්‍රව්‍ය පැමිණීම පිළිබඳව පුළුල් පරීක්ෂණයක් සිදුකරන ලෙස ජනාධිපතිවරයා විසින් ආරක්ෂක අංශවෙත උපදෙස් ලබාදී තිබේ.
මේ අතර, විශ්වවිද්‍යාල පද්ධතිය රැකගත හැක්කේ, විනය විරෝධී කටයුතු සිදුකරන සිසුන්ට එරෙහිව දැඩි පියවර ගැනීමෙන් පමණක් බව අමාත්‍ය බන්දුල ගුණවර්ධන මහතා පවසයි.
ශිෂ්‍යභාවය අහෝසි කිරීම වැනි තීරණවලට එළඹිය යුතු බවත් එවිට බියෙන් හා සැකයෙන් තොරව විශ්වවිද්‍යාල තුළ අධ්‍යාපනය හැදෑරීමට අවකාශය හිමිවන බවත් අමාත්‍යවරයා මෙහිදී කියා සිටියේය.
