ලංකා ප්‍රිමියර් ලීග් (එල්පීඑල්) විස්සයි20 ක්‍රිකට් තරගාවලිය ආරම්භ කරමින් ඊයේ කොළඹ ආර්. ප්‍රේමදාස ක්‍රීඩාංගණයේ පැවැති පළමු තරගයෙන් පසුගිය වසරේ ශූරයන් වූ ජැෆ්නා කණ්ඩායම පරදවා ලකුණු 54ක ජයක් හිමි කර ගැනීමට එවර අනුශූරයන් වූ ගෝල් ග්ලැඩියේටර්ස් කණ්ඩායම සමත් විය.
තරගයේ කාසියේ වාසිය දිනාගැනීමට ජැෆ්නා කිංග්ස් කණ්ඩායම සමත් වූ අතර ඔවුන් තීරණය කළේ පළමුවෙන් පන්දුවට ගෝල් ග්ලැඩියේටර්ස් කණ්ඩායමට ලබාදීමටය.
ගෝල් කණ්ඩායම කඩුලු 7ක් දැවී ලකුණු 164ක් රැස් කළ අතර, පිළිතුරු ඉනිම සඳහා පිටියට පිවිසි ජැෆ්නා කිංග්ස් කණ්ඩායම පන්දුවාර 18 පන්දු 4ක් තුළ සියලු දෙනා දැවී රැස්කර ගැනීමට හැකි වූයේ ලකුණු 110ක් පමණි.
එහිදී ගෝල් ග්ලැඩියේටර්ස් වෙනුවෙන් නායක භානුක රාජපක්ෂ 56ක් රැස්කළ අතර සමිත් පටෙල් නොදැවී ලකුණු 42ක් රැස් කළේය.
පන්දු යැවිමේදී ජැෆ්නා කිංග්ස් කණ්ඩායම වෙනුවෙන් ජේඩන් සීල්ස් කඩුලු 3ක් දවා ගත් අතර වනිඳු හසරංග කඩුලු 2ක් දවාගත්තේය.
LPL තරගාවලියේ ප්‍රවේශපත්
LPL තරගාවලියේ ප්‍රවේශපත් පෙ.ව. 9.00 සිට ප.ව. 5.00 දක්වා ශ්‍රී ලංකා ක්‍රිකට් ආයතනයෙන් මිලදීගත හැකිය.
එමෙන්ම ඔන්ලයින් ක්‍රමයට ද ප්‍රවේශපත් වෙන්කර ගත හැකිය.
එසේ ඔන්ලයින් ඔස්සේ ලබාගත් ප්‍රවේශපත් ඛෙත්තාරාම ක්‍රීඩාංගණයෙන් ලබාගැනීමට හැකිය.
රුපියල් 300, 1,000, 2,000, 3,000 සහ 5,000 යන මිල ගණන් සඳහා ප්‍රවේශපත් ලබාගත හැකි බව ශ්‍රී ලංකා ක්‍රිකට් ආයතනය නිවේදනය කළේය.
