ශ්‍රී ලංකා ක්‍රිකට් ආයතනයේ සංවිධානයෙන් ආරම්භ වෙන ඩයලොග් – ශ්‍රී ලංකා ක්‍රිකට් ආරාධිත විස්සයි විස්ස ක්‍රිකට් තරගාවලිය අද (12) පල්ලෙකැලේ ජාත්‍යන්තර ක්‍රිකට් ක්‍රීඩාංගණයේදී ආරම්භ වීමට නියමිතය.
තරගාවලිය ආරම්භ කරමින් දසුන් ශානකගේ ග්‍රේස් කණ්ඩායම අශාන් ප්‍රියන්ජන්ගේ ග්‍රීන්ස් කණ්ඩායම සමගින් ප.ව. 2.30ටත්, ධනංජය ද සිල්වාගේ බ්ලූස් කණ්ඩායම දිනේෂ් චන්දිමාල්ගේ රෙඩ්ස් කණ්ඩායම සමගින් රාත්‍රී 7.00ටත් අද (12 ) තරග වැදීමට සූදානමින් සිටී.
මීට අමතරව වනිඳු හසරංගට සහ දුෂ්මන්ත චමීරව මෙම තරගාවලියෙන් විවේක ගන්වා තිබෙන අතර ඇඟිල්ලේ ආබාධයක් හේතුවෙන් ග්‍රේස් පිලේ භානුක රාජපක්ෂට මෙම තරගාවලිය අහිමි වී තිබේ. ජ්‍යෙෂ්ඨ ක්‍රීඩකයින් වන ඇන්ජලෝ මැතිව්ස් සහ දිමුත් කරුණාරත්න මෙම තරගාවලියට ඇතුළත්ව නොතිබීම විශේෂත්වයකි.
අද (12) සිට දවසක් ඇර දවසක් පැවැත්වෙන තරගාවලියේ පළමු තරගය ප.ව. 2.30ටත් දෙවැනි තරගය රාත්‍රී 7.00ටත් පල්ලෙකැලේ ජාත්‍යන්තර ක්‍රිකට් ක්‍රීඩාංගණයේදී පැවැත්වේ.
එහිදී එක් කණ්ඩායමකට මූලික වටයේදී තරග 6 බැගින් හිමිවන අතර එයින් වැඩිම ප්‍රසාද ලකුණු හිමිකරගන්නා කණ්ඩායම් දෙක ලබන 24 වැනිදා රාත්‍රි 7.00ට අවසන් මහා තරගයේදී තරග වඳිනු ඇත.
