වෙළෙඳසලකින් පිහි කිහිපයක් සොරාගෙන, ඒවා සිය යට ඇඳුම් අස්සේ සඟවාගෙන වෙළෙඳසලින් පිටතට පැමිණීමට උත්සාහ දැරූ පුද්ගලයකු ඒ පිහිවලටම කැපී තුවාල ලබා රෝහල් ගත කිරීමේ පුවතක් ඇමෙරිකා එක්සත් ජනපදයේ මිචිගන් ප්‍රාන්තයෙන් වාර්තා වේ.
ඇමෙරිකානු ඩොලර් 300ක වටිනාකමින් යුත් මේ පිහි සොරකම නිසා අමතක නොවන පාඩමක් ඉගෙන ගත් මේ පුද්ගලයා දැන් පොලිස් ආරක්ෂාව යටතේ එරට රෝහලක ප්‍රතිකාර ලබයි.
වෙළෙඳසල තුළ දී අසාමාන්‍ය හැසිරීමක් පෙන්නුම් කළ මේ පුද්ගලයා පිළිබඳව ඇස ගසාගෙන සිටි වෙළෙඳ සේවිකාවක ඔහුගේ සොරකම දැක ඇත.
ඒ සමගම ඔහුගේ ඇඳුම් තුළින් රුධිරය ගලා යනු දුටු මේ සේවිකාව ඒ පිළිබඳව වෙළෙඳස‍ලේ ප්‍රධානීන්ට දැනුම් දීමත් සමග මොහු පිළිබඳව සියලු තොරතුරු අනාවරණය විය. ඒ වන විටත් ඔහු සිටියේ පිහිවලට කැපී ඉතාමත් අපහසුවෙනි.
කෙසේ වුවත් ඔහුගේ තත්ත්වය එතරම්ම බරපතළ නොවන බව රෝහල් ආරංචි මාර්ග සඳහන් කරයි.
