අවසන් දිනයේදී ජයග්‍රහණය සඳහා ලකුණු 341 ක් ලබා ගැනීමේ අභියෝගය පසෙක තැබූ බටහිර ඉන්දීය කොදෙව් පිතිකරුවන් ජය පැරදුමෙන් තොරවූ තරගාවසානයක් වෙනුවෙන් සැලසුම් සහගතව පන්දුවට පහර දීම නිසා ශ්‍රී ලංකාවට එරෙහිව පැවැති පළමු ටෙස්ට් තරගය ජය පැරදුමෙන් තොරව අවසන් කර ගැනීමට බටහිර ඉන්දීය කොදෙව්වෝ සමත්වූහ.
ඇන්ටිගුවාහි ශ්‍රීමත් විවියන් රිචර්ඩ්ස් ක්‍රීඩාංගණයේ පැවැති මෙම තරගයේ පස්වැනි දිනයේදීත් තණතීරුව පිතිකරුවන්ට ඉතාමත් යෝග්‍ය මට්ටමක පැවැතීම පුදුමය දනවන්නක් විය. එහිදී කඩුලු 9 ක් අතැතිව පස්වැනි දිනය වූ බ්‍රහස්පතින්දා දින තරගයට අවතීර්ණ වුණු කොදෙව් පිතිකරුවන්ට ජයග්‍රහණය සඳහා පන්දුවාරයකට රඳවා ගත යුතු වූයේ ලකුණු 3.75 ක අගයක් වන නමුත් ලකුණු 2.53 ක වේගයක් රඳවා ගත් කොදෙව් පිතිකරුවෝ තරගය ජය පැරදුමෙන් තොරව අවසන් කර ගත්හ.
පන්දු යැවීමේදී ලසිත් ඇඹුල්දෙණිය සහ විශ්ව ප්‍රනාන්දු කොදෙව් ඉනිමේ දැවී ගිය කඩුලු 4 අඩක් බැගින් බෙදා ගත්හ. දෙරට අතර පැවැත්වෙන දෙවැනි ටෙස්ට් තරගය ලබන මාර්තු 29 වැනිදා නෝර්ත් සවුන්ඩ්හිදී ආරම්භ වේ.
