ඊයේ (6) උදෑසන google.lk වෙබ් ලිපිනය යම් සයිබර් ප්‍රහාරයකට මුහුණදී තිබුණු අතර මෙම සයිබර් ප්‍රහාරය එල්ල කරන ලද කණ්ඩායම විසින් තවත් වෙබ් අඩවියක් වෙත සයිබර් ප්‍රහාරයක් සිදුකර ඇතැයි අප ශ්‍රී ලංකා තොරතුරු තාක්ෂණ සංගමයට සැක මතුව තිබේ. .lk වෙබ් ලිපිනයන් මෙහෙයවන සමාගමක්ද මෙම සයිබර් ප්‍රහාරයේ ගොදුරක් බවට පත්වී ඇත්දැයි එම සමාගමට අදාළ වෙබ් අඩවිය මගින් නිකුත් කර ඇති නිවේදනය හේතුවෙන් සැක පහලව තිබේ.
මේ හේතුවෙන් .lk වෙබ් අඩවි වලට අදාළ සංවේදී මුරපද මාරු කිරීමට කටයුතු කිරීම ආරක්‍ෂිත ක්‍රමවේදයක් ලෙස අප ශ්‍රී ලංකා තොරතුරු තාක්ෂණ සංගමය දකින්නෙමු.
ඊයේ දින සිදුවූ සයිබර් ප්‍රහාරය සිදුකිරීමට සයිබර් ප්‍රහාරකයන් විසින් යොදාගත් ආරක්‍ෂිත දෝෂය යොදාගනිමින් මින් පෙර .lk වෙබ් ලිපින තිබූ කුඩා වෙබ් අඩවි වෙතට සයිබර් ප්‍රහාර මින් පෙර සිටම සිදුකර ඇත්තේද පිලිබදව සැකයක් අප ශ්‍රී ලංකා තොරතුරු තාක්ෂණ සංගමයට මතුව තිබේ.
මෙලෙස සිදුවන සයිබර් ප්‍රහාර ජාතික ආරක්ෂාවට, ආර්ථිකයට තර්ජනයක් බැවින් සයිබර් ආරක්ෂණය ඉහල නැංවීමට විධිමත් වැඩපිළිවෙලක් සිදුකිරීමට කටයුතු කරනා ලෙස ශ්‍රී ලංකා රජයෙන් හා ආරක්ෂක අමාත්‍යාංශයෙන් අප ශ්‍රී ලංකා තොරතුරු තාක්ෂණ සංගමය ලෙස අවධාරණය කරමු.
ශ්‍රී ලංකා තොරතුරු තාක්ෂණ සංගමය
කෙසේ වෙතත් වෙබ් අඩවිවල දත්ත සොරාගෙන ඇති බවට කිසිදු සාක්ෂියක් මෙතෙක් වාර්තා වී නොමැත.
LK ඩොමේන් හෙවත් ලංකා වසම් ලේඛකාධිකාරියේ ලේඛකාධිකාරි මහාචාර්ය ගිහාන් ඩයස් මහතා පැවසුවේ මෙය රජයේ වෙබ් අඩවි ඉලක්ක කරමින් සිදු කර ඇති බවයි.
රජයේ වෙබ් අඩවි ඇතුළු සෙසු වෙබ් අඩවිවල අයි.පී. ලිපින මාරු කර වෙනත් වෙබ් අඩවියකට පිවිසීමට ඉඩ හැර ඇති බව ද මහාචාර්යවරයා සඳහන් කළේ ය.
LK ඩොමේන් හෙවත් ලංකා වසම් ලේඛකාධිකාරියේ ලේඛකාධිකාරි මහාචාර්ය ගිහාන් ඩයස් මහතා
”මේක උදේ පාන්දර වෙලා තියෙන්නේ. ඒත් ඒ වෙලාවෙම ඒක දැනගන්න ලැබුණා. ඊට පස්සෙ අපි ඒ වෙලාවෙම පටන් ගත්තා මොකක්ද මේ වෙලා තියෙන්නෙ කියලා බලන්න.. අපි උදේ 8:30 වගේ වෙනකොට මේ ඔක්කොම ටික සියයට සියයක්ම හදලා යථා තත්ත්වයට පත් කළා. කොහොමද මේක වුණේ කොහෙන්ද මේ ප්‍රශ්නය ඇතිවුණේ කියන එක අපි දැනට විශ්ලේෂණය කරගෙන යනවා. ටික දවසක් යනකොට මොකක්ද මේ වුණේ කියලා හරියටම දැනගෙන ඒක දැනගත්තායින් පසුව නිසි පියවර ගන්නවා”
මෙම සිද්ධියෙන් ජාතික ආරක්ෂාවට කිසිදු බලපෑමක් නොමැති බව මහජන ආරක්ෂක අමාත්‍ය විශ්‍රාමික රියර් අද්මිරල් සරත් වීරසේකර මහතා සඳහන් කළේ ය.
ඔහු පැවසුවේ මීට සම්බන්ධ පුද්ගලයින් සොයා විමර්ශන ක්‍රියාත්මක බවයි.
LK ඩොමේන් හෙවත් ලංකා වසම් ලේඛකාධිකාරියේ ලේඛකාධිකාරි මහාචාර්ය ගිහාන් ඩයස් මහතා
“මේ වගේ ප්‍රශ්න ඇත්තටම අනාගතයේදීත් එන්න පුළුවන්. අන්තර්ජාලයේ කට්ටිය ඉන්නවා ඒ ගොල්ලො බලන්නේ කාට හරි කියන ඒගොල්ලන්ගෙ වැඩ පෙන්වලා කාටහරි ප්‍රශ්නයක් ඇති කරන්න. පරිගණකයක් සෑම ෆෝන් එකක් ම මොනවා හරි අදට වඩා වෙනසක් වෙලා තියෙනවා නම් වහාම ඒකට පියවර ගන්න ඕන. අපේ ඩොමේන් එකට සම්බන්ධ අයට නම් අපිට කතා කරන්න පුළුවන්. එහෙම නැත්තං තියෙනවා සර්ට් ආයතනය. පෞද්ගලිකව මොකක් හරි ප්‍රශ්නයක් ඇතිවෙලා තියෙනවා නං අන්තර්ජාලය හරහා හිතවතී ඩොට් එල්.කේ. කියන සේවයට ඇවිල්ලා අහන්න පුළුවන්. අපි බලාපොරොත්තුවෙන් ඉන්නවා ඕනෑම කෙනෙක්ට අන්තර්ජාලය තුළ ප්‍රශ්නයක් ඇතිවෙලා තියෙනවා නම් ඒකට විසඳුමක් හොයල දෙන්න”
