මහනුවර, දිගන ප්‍රදේශය ආශ්‍රිතව ඊයේ (05) පස්වරුවේ තවත් සුළු භූ කම්පන තුනක් සිදුවී තිබේ.
අදාළ චලනයන් වික්ටෝරියා ජලාශයේ භූ කම්පන මාපකවල සටහන්ව ඇති බව වාර්තා විය.එම කම්පන සිදුවී ඇත්තේ පස්වරු 4.00 සිට රාත්‍රී 7.00 දක්වා කාලය තුළ ය.
සියලු කම්පන රික්ටර් මාපක ඒකක 2ට අඩු අගයක් ගන්නා බව භූ විද්‍යා හා පතල් කැණිම් කාර්යාංශය සඳහන් කරයි.
ඊයේ උදෑසන 05.41කට පමණ දිගන අළුත්වත්ත ප්‍රදේශය ආශ්‍රිතව ද භූ චලනයක් සිදුවී තිබුණි.
එය පල්ලෙකැලේ සහ මහකනදරාව යන භූ කම්පන මධ්‍යස්ථානවල රික්ටර් මාපක ඒකක 02ක ප්‍රබලත්වයක් ලෙස සටහන්ව තිබූ බව භූ විද්‍යා හා පතල් කැණිම් කාර්යාංශයේ ප්‍රකාශකයෙකු ප්‍රකාශ කරන ලදි.
මහනුවර , දිගන ප්‍රදේශය ආශ්‍රිතව සිදුවූ භු කම්පන සම්බන්ධයෙන් සැලකිලිමත් විය යුතු බව වික්ටෝරියා ජලාශයේ කාර්යය භාර ඉංජිනේරු වසන්ත ඇහැලපිටිය මහතා පවසයි.
ඔහු පැවසුවේ , ඊයේ සිදුවූ භු ඡලනය වික්ටෝරියා ජලාශයේ භූ කම්පන මාපකවල සටහන්ව ඇති බවයි.
මහනුවර දිගන ප්‍රදේශයේ ඇතිවෙන භූ කම්පන සිදුවීම් සදහා හේතු වන්නේ වික්ටෝරියා ජලාශ පතුලේ පාශාණ ස්ථර වල බිදවැටීමක් බවට සැක පළ වන බවද සදහන්.
