එංගලන්ත එක්දින ක්‍රිකට් කණ්ඩායමේ ප්‍රධාන පුහුණුකරු ලෙස ශ්‍රී ලංකා හිටපු විශිෂ්ඨ ක්‍රීඩක කුමාර් සංගක්කාර තෝරාගැනීමට එංගලන්ත බලධාරීන්ගේ වැඩි කැමැත්තක් තිබෙන බව විදෙස් මාධ්‍ය වාර්තා කරනවා.
වත්මන් එක්දින පුහුණුකරු ලෙසින් ඔස්ට්‍රේලියානු ජාතික මැතිව් මෝට් කටයුතු කරන අතර, දෙවසරකට ආසන්න (2022 වසරේදී සිට) මෝට්ගේ සේවය ලබන සතියේදී අවසන් වීමට නියමිතව ඇත.
සංගක්කාර 2021 ජනවාරි මාසයේ සිට ඉන්දීය ප්‍රිමියර් ලීග් තරගාවලියේ රාජස්ථාන් රෝයල්ස් කණ්ඩායමේ ක්‍රිකට් අධ්‍යක්ෂවරයා ලෙසින් කටයුතු කරයි.
එම කාලය රාජස්ථාන් කණ්ඩායම විශේෂ පරිවර්ථනයකට ලක්කළ ඔහු, සිය කණ්ඩායම IPL අවසන් මහා තරගයක් දක්වා රැගෙන යාමට මඟපෙන්වීම ලබාදුන්නා.
එමෙන්ම රාජස්ථාන් කණ්ඩායමේ ප්‍රධාන ක්‍රීඩකයෙකු ලෙස වත්මන් එංගලන්ත නායක ජොෂ් බට්ලර් කටයුතු කරයි.
ඒ අනුව බට්ලර් හා සංගක්කාර අතර තිබෙන්නා වූ එම හුරුපුරුදු බවද සංගාගේ තෝරාගැනීමට තවත් විශේෂ හේතුවක් වී තිබේ.
කෙසේ නමුත් සංගක්කාරට අමතරව ඔස්ට්‍රේලියානු හිටපු පිතිකරු මයිකල් හසී සහ ඇෆ්ගනිස්තාන ප්‍රධාන පුහුණුකරු මෙන්ම එංගලන්ත හිටපු පිතිකරු ජොනතන් ට්‍රොට් ද එංගලන්ත එක්දින පුහුණුකාරිත්වය අපේක්ෂාවෙන් සිටින බව වාර්තා වේ.
එංගලන්ත ටෙස්ට් ක්‍රිකට් කණ්ඩායමේ ප්‍රධාන පුහුණුකරු ලෙසින් නවසීලන්ත හිටපු නායක බ්‍රෙන්ඩන් මැකලම් කටයුතු කරයි.
