විස්සයි විස්ස ලෝක කුසලාන තරගාවලියට එක්වන ශ්‍රී ලංකා කණ්ඩායම අද (14) උදැසන කටුනායක ගුවන් තොටුපොළෙන් ඇමරිකා එක්සත් ජනපදය බලා පිටත්ව ගියා.
ශ්‍රී ලංකා කණ්ඩායම එමිරේට්ස් ගුවන් සේවයේ ඊ.කේ – 651 දරණ ගුවන් යානයෙන් පළමුව ඩුබායි බලා පිටත්ව ගොස් එතැන් සිට ඇමරිකාවේ නිව්යෝර්ක් නුවර බලා පිටත්ව යාමට නියමිතයි.
ශ්‍රී ලංකා සංචිතයේ ක්‍රීඩකයින් 15 දෙනා, අතිරේක ක්‍රීඩකයින් 04 දෙනා සහ සහාය කාර්ය මණ්ඩලය සමඟ 25 දෙනෙකුගෙන් යුතු පිරිසක් මෙලෙස ඇමරිකාව බලා පිටත්ව ගිය බවයි ගුවන්තොටුපොළ අප වාර්තාකරු සඳහන් කළේ.
විස්සයි විස්ස ලෝක කුසලාන තරගාවලිය ජූනි මස 01 වනදා සිට ජූනි මස 29 දින දක්වා ඇමරිකා එක්සත් ජනපදයේ සහ බටහිර ඉන්දීය කොදෙව් දූපත් හිදී පැවැත්වීමට නියමිතයි.
