මෙවර ජාතික පැළ රෝපණ නැකතේ දී ඵල දරන කුමන හෝ පැළයක් සිටුවන ලෙස කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා පවසනවා.
අමාත්‍යවරයා මේ බව සඳහන් කළේ නැකතට පැළ රෝපණය කිරීම සඳහා පාර්ලිමේන්තුවේ කතානායක මහින්ද යාපා අබේවර්ධන මහතා ඇතුළු පාර්ලිමේන්තු නිලධාරි කණ්ඩායමට පලතුරු පැළ බෙදා දීමේ වැඩසටහනට එක් වෙමින්.
සිංහල හා දෙමළ අලුත් අවුරුදු නැකැත් සිට්ටුව අනුව යමින් ජාතික පැළ සිටුවීමේ නැකත මෙවර අප්‍රේල් මස 18 දින පෙරවරු 10.16ට යෙදී තිබෙනවා.
නැකතට පැළයක්- ජාතියට හුස්ම දෙන නැකත යන තේමාව යටතේ මෙවරත් දිවයින පුරා පැළ රෝපණය කිරීමේ වැඩ සටහන් ගණනාවක් ක්‍රියාත්මක කිරීමටයි කෘෂිකර්ම හා වැවිලි කර්මාන්ත අමාත්‍යාංශය කටයුතු යොදා ඇත්තේ.
.
මෙහිදි අදහස් පළ කළ අමාත්‍යවරයා මෙවර ජාතික පැළ රෝපණ නැකතේ දී ඵල දරන කුමන හෝ පැළයක් සිටුවන ලෙසත්, ගෙවතු වගා වැඩ සටහනක් දිවයිනම ආවරණය වන පරිදි ක්‍රියාත්මක කිරීමට සැලසුම් කර ඇති බවත් සඳහන් කළා.
එම ගෙවතු වගා වැඩසටහන යටතේ එළවළු හා පලතුරු පැළ මෙන්ම බීජ ද ලබා දීමේ වැඩපිළිවෙළක් කෘෂිකර්ම දෙපාර්තමේන්තුව හා ගොවිජන සංවර්ධන දෙපාර්තමේන්තුවේ අනුග්‍රහයෙන් ක්‍රියාත්මක කිරීමට යෝජිතයි.
ඒ අනුව ගොවිජන සංවර්ධන දෙපාර්තමේන්තුව විසින් ගෙවතු ලක්ෂයක් හා කෘෂිකර්ම දෙපාර්තමේන්තුව විසින් ගෙවතු 30,000ක් ද ක්‍රියාත්මක කිරීමට නියමිතයි.
