මහර ආසනයට අයත් වෑබඩ, වෑබඩ උතුර ප්‍රදේශයේ කම්මල් කර්මාන්තයේ නිරත කම්මල්කරුවන්ට අවශ්‍ය අමුද්‍රව්‍ය වන දුනුකොළ ආශ්‍රිත වානේ, පොල් කටු අඟුරු වැනි විවිධ අමුද්‍රව්‍යවල මිල ඉහළ යෑම නිසා ඔවුන් විවිධ ගැටලුවලට මුහුණපා ඇති බව ප්‍රදේශවාසීන් පවසති.
මීට අමතරව ප්‍රදේශයේ කම්මල් කර්මාන්තයේ නිරත සමහර ශ්‍රමිකයන් ප්‍රමිතියෙන් උසස් වානේ වෙනුවට ප්‍රමිතියෙන් තොර යකඩ යොදා මන්න, පිහි, විසිකැති, පොරව, ගිර ඇතුළු විවිධ භාණ්ඩ නිපදවීම නිසා පාරිභෝගික ජනතාව මෙම භාණ්ඩ මිලදී ගැනීමට මැලිකමක් දක්වති. කම්මල් කර්මාන්තය කය වෙහෙසා කරන කටයුත්තක් බැවින් තරුණ පරපුර මෙම කර්මාන්තයට යොමුවීමට මැලිකමක් දක්වන බව ප්‍රදේශවාසීන් පෙන්වා දෙති.
මීට අමතරව නවීන තාක්ෂණික ක්‍රම යටතේ නවීන ආදේශක භාණ්ඩ වෙළෙඳ පොළට පැමිණීම නිසා කම්මල්කරුවන් නිපදවන භාණ්ඩ මිලදී ගැනීමට පාරිභෝගික ජනතාව කටයුතු නොකිරීම නිසා කම්මල් කර්මාන්තකරුවන් සිය නිෂ්පාදන විකිණීමේදී විවිධ ගැටලුවලට මුහුණපා සිටිති.
මේ වන විට වෑබඩ, වෑබඩ උතුර ප්‍රදේශයේ කම්මල් කර්මාන්තයේ නිරත ශ්‍රමිකයන් වැඩි වශයෙන් මන්න, පිහි, කැති, ගිර, පොල් උල්, හිරමණ තල ඇතුළු විවිධ භාණ්ඩ නිපදවීමට කටයුතු කරති.
වෑබඩ, වෑබඩ උතුර ප්‍රදේශයේ පදිංචි එම්. ජී. තිලක් මහතා මෙසේ පැවසීය.
මම පාරම්පරිකව වසර ගණනාවක සිට කම්මල් කර්මාන්තයේ නිරත වනවා. මේ වන විට මෙම කර්මාන්ත කටයුතු සඳහා අවශ්‍ය වානේ කිලෝවක් රුපියල් 500ක් පමණ වනවා. පොල්කටු අඟුරු කිලෝවක් රුපියල් 160ක් වනවා. මෙම අමුද්‍රව්‍යවල මිල ඉහළ යාම නිසා අපට මෙම ස්ථානයේ භාණ්ඩ නිපදවා ඒවා වැඩි මිලකට විකිණීමට සිදු වන නිසා මෙම භාණ්ඩ විකිණීමේදී අපි විවිධ ගැටලුවලට මුහුණපා සිටිනවා. මීට අමතරව ප්‍රදේශයේ විවිධ කර්මාන්තකරුවන් මෙම කම්මල් කර්මාන්තයේදී ප්‍රමිතියෙන් වැඩි වානේ වෙනුවට ප්‍රමිතියෙන් තොර යකඩ යොදා ගෙන භාණ්ඩ නිපදවීම නිසා පරිභෝගික ජනතාවට මෙම ප්‍රදේශයෙන් භාණ්ඩ මිලදී ගැනීමේදී දෙවරක් සිතීමට සිදු වනවා.
කම්මල් කර්මාන්තය පිළිබඳ ජනතාව අතර පවතින විවිධ ආකල්ප නිසාත් මෙම කර්මාන්තයේදී කය වෙහෙසා වැඩ කිරීමට සිදු වන නිසා තරුණ පරපුර මේ සඳහා යොමු වන්නේ නැහැ. මීට අමතරව නවීන තාක්ෂණික දැනුම මෙම කර්මාන්තයට යොදා ගැනීම පිළිබඳ තරුණ ශ්‍රමිකයන්ට රජය මැදිහත්ව පුහුණු පාඨමාලා මෙම ප්‍රදේශය අශ්‍රීතව ආරම්භ කිරීමට කටයුතු කළ යුතු වනවා. මෙම කර්මාන්තයේ නිරත ශ්‍රමිකයන්ට සිය කර්මාන්ත කටයුතු දියුණු කර ගැනීමට සහනදායි පොලී අනුපාතය යටතේ ණය සහ ආධාර රජය මැදිහත්ව ලබා දෙන්නේ නම් මෙම කර්මාන්ත කටයුතු සාර්ථකව සිදු කිරීමට හැකි වනවා.
වෑබඩ, වෑබඩ උතුර ප්‍රදේශයේ පදිංචි සනී සුජීව මහතා මෙසේ පැවසීය.
මේ වන විට මෙම කර්මාන්ත කටයුතුවලට අවශ්‍ය අමුද්‍රව්‍යවල මිල ඉහළ යාම නිසා අපි විවිධ ගැටලුවලට මුහුණපා සිටිනවා. මේ නිසා මෙම ස්ථානයේ නිපදවන භාණ්ඩවල මිල වැඩි වීම නිසා පරිභෝගික ජනතාව ඒවා මිලදී ගැනීමට මැලිකමක් දක්වනවා. මෙම ප්‍රදේශය ආශ්‍රිතව කම්මල් කර්මාන්තයේ නිරත සමහර ශ්‍රමිකයන් ප්‍රමිතියෙන් උසස් වානේ වෙනුවට ප්‍රමිතියෙන් තොර යකඩ වැනි අමුද්‍රව්‍ය භාවිතා කිරීම නිසා අපේ භාණ්ඩ මිලදී ගැනීමට පාරිභෝගික ජනතාව එතරම් කැමත්තක් දන්වන්නේ නැහැ.
කම්මල් කර්මාන්තයේදී කය වෙහෙසා වැඩ කිරීමට සිදු වීම නිසාත් ජනතාව අතර පවතින විවිධ ආකල්ප නිසාත් තරුණ පරපුර මෙම කර්මාන්තය සඳහා යොමු වීමට දැඩි මැලිකමක් දක්වනවා. ඒ අනුව කම්මල් කර්මාන්තයේ නිරත ශ්‍රමිකයන් සිය ව්‍යාපාර කටයුතු දියුණු කර ගැනීමට රජය මැදිහත්ව සහනදායි පොලී අනුපාත යටතේ ණය හෝ අධාර ලබාදීමට කටයුතු කරන ලෙස ඉල්ලා සිටිනවා.
