දේශීය ජන සමාජයේ දිගු ඉතිහාසයක් ඇති කුලු කර්මාන්තයට මූලික පහසුකම්වත් නොමැති බැවින් එය පිරිහෙමින් පවතින අතර, මේ නිසා පෙරදී පැවති කුලු කර්මාන්ත ගම්මාන අහෝසි වී යාමේ තත්ත්වයක් පැන නැඟී ඇති බැවින් මෙම පැරැණි දේශීය කර්මාන්තය නඟා සිටුවීමට පියවර ගත යුතු යැයි මාතලේ දිස්ත්‍රික්කයේ කුලු කාර්මිකයෝ පවසති.
අතීතයේ කුලු කර්මාන්තය විශාල වශයෙන් දිස්ත්‍රික්කයේ පාරම්පරික ගම්මාන රැසක පැවති නමුත් සමාජීය ප්‍රශ්න මත මෙම කර්මාන්තයෙන් ක්‍රමයෙන් තරුණ පරපුර ඉවත් වීමත් සමඟම කර්මාන්තය කඩා වැටෙන්නට විය.
මෙම තත්ත්වය නිසා මෙම කර්මාන්තය දැනට දිස්ත්‍රික්කයේ පවුල් දෙක තුනකට පමණක් සීමා වී ඇත. තවද මේ වනවිට තහඩුවෙන් නිම කරන ලද කුලු ආනයනය කිරීමට රාජ්‍ය අනුග්‍රහය මත වෙළෙඳුන් පියවර ගෙන ඇති බැවින් දේශීය කුලු වෙනුවට ආනයනික කුලු අඩු මිලට ගැනීමට පාරිභෝගිකයන්ට හැකි වීමෙන් ඔවුන් ඒ වෙත ඇදී යාම වැළැක්විය නොහැකිය.
මෙම තත්ත්වය නිසා දේශීය කුලු කර්මාන්තය නඟා සිටු වීමට නම් කුලු ආනයනය කිරීම නතර කළ යුතු බව මොවුහු පෙන්වා දෙති.
