මසට විකිණීම සඳහා කිරි ඉබ්බන් සය දෙනෙකු ළඟ තබා ගෙන සිටි පුද්ගලයෙකු ජා-ඇළ පාරිස් පෙරේරා මාවතේ දී අත්අඩංගුවට ගත් බව ජා-ඇළ පොලිසිය පවසයි.
සැකකරුගේ නිවෙස පිටුපස රහසිගතව සඟවා තිබූ කල්දේරමක තිබී මේ ඉබ්බන් සොයාගැනීමට හැකිවූ බව පොලිසිය සඳහන් කරයි. සැකකරු පදිංචිව සිටින ජා-ඇළ ඉවුරට (ඌරුවෙල් ඔය) යාබද නිවෙසේ සිට ඇළේ සිටින ඉබ්බන් අල්ලා මුදලට විකිණීම කාලයක් මුළුල්ලේ සිට ඔහු විසින් කරගෙන ගොස් ඇති බව වැඩිදුර විමර්ශන කටයුතුවලදී හෙළිවූ බව පොලිසිය පවසයි.
ඔන්ලයින් ක්‍රමයට ගැනුම්කරුවන් සම්බන්ධ කරගෙන කිලෝ එකක් බරැති කිරි ඉබ්බෙකු රුපියල් 20,000ක් වැනි මිලකට අලෙවි කොට ඇති බවටද අනාවරණය වූ බව පොලිසිය පවසයි. අවුරුදු 45ක් වයසැති සැකකරු වැලිසර මහේස්ත්‍රාත් අධිකරණය වෙත ඉදිරිපත් කිරීමට නියමිතය.
