ආසියානු කුසලානයේ ක්‍රිකට් තරග පැවැත්වෙන දිනයන්වල දී කොළඹ ආර්. ප්‍රේමදාස ක්‍රීඩාංගණය අවට මාර්ගවල විශේෂ රථවාහන සැලැස්මක් ක්‍රියාත්මක කිරීමට හෙට (09) සිට පොලීසිය පියවර ගෙන ඇත.
2023 ආසියානු කුසලාන ක්‍රිකට් තරගාවලියේ සුපිරි කණ්ඩායම් හතර වටයේ තරග හෙට සිට ලබන 15 වැනිදා දක්වා පැවැත්වේ.
අවසන් මහා තරගය 17 වැනිදා කොළඹ ආර් ප්‍රේමදාස ක්‍රීඩාංගණයේදී පැවැත්වීමට සැළසුම්කර තිබේ.
පකිස්ථානයේ දී පැවැත්වෙන තරගවලට සහභාගීවීම සඳහා එරට ගොස් සිටි ශ්‍රී ලංකා, බංග්ලාදේශ හා පකිස්ථාන කණ්ඩායම එකම ගුවන් යානයකින් මෙරටට පැමිණියේය.
ඔවුන් පිළිගැනීමට ශ්‍රී ලංකා ක්‍රිකට් ආයතනයේ නිළධාරීන් පිරිසක් ගුවන් තොටුපොළට පැමිණ සිටියහ.
සුපිරි කණ්ඩායම් 04 වටයේ මෙරට තරග ආරම්භ කරමින් ශ්‍රී ලංකාව සහ බංග්ලාදේශය හෙට තරග වැදීමට නියමිතය. එය පස්වරු 3.00ට ආරම්භ කෙරේ.
