ශ්‍රී ලංකාවේ මිරිස්ස වෙරළ තීරය ආසියාවේ හොඳම වෙරළ තීර අතර සිව් වැනි තැනට පත්ව තිබේ.
ඉන්දියාවේ හැව්ලොක් දූපත රාධනගර් වෙරළ ආසියාවේ අංක එකේ වෙරළ තීරය ලෙස තේරී ඇති අතර දෙවැනි තැන ඉන්දුනීසියාවේ නුසා පෙනිඩා හී කෙලින්කිං වෙරළත් තුන්වැන්න ලෙස ඉන්දියාවේම බෙනෝලිම් හී වෙරළ හිමි කරගෙන ඇති බවයි මෙම වෙබ් අඩවිය වාර්තා කර ඇත්තේ.
ඒ ආසියාවේ හොඳම වෙරළ තීරය සම්බන්ධයෙන් සංචාරක ක්ෂේත්‍රයේ වෙබ් අඩවියක් වන Tripadvisor මඟින් පසුගිය මාස 12ක කාලයක් තුළ සිය පාඨකයන් සමඟ එක්ව කරන ලද සමීක්ෂණයකින් අනතුරුවයි.
මෙම සමීක්ෂණය සඳහා ඉන්දියාව, ජපානය, තායිලන්තය, වියට්නාමය, දකුණු කොරියාව මෙන්ම ශ්‍රී ලංකාවේ වෙරළ කලාප යොදා ගෙන තිබේ.
මේ වසරේ ජයග්‍රාහී වෙරළ තීරයන් තෝරා ගැනීම සඳහා රන්වන්වැලි තීර, රළු වෙරළ තීරයන්, පැහැදිලි නිල් ජලය යන නිර්නායකයන් යොදා ගෙන තිබුණි.
සංචාරක ව්‍යාපාරයට සම්බන්ධ පිරිස් පෙන්වා දෙන්නේ මේ තේරීම මෙරට සංචාරක ව්‍යාපාරයට වාසිදායක ලෙස ප්‍රවර්ධනය කළ හැකි විශේෂ අවස්ථාවක් බවයි.
