අමෙරිකාවෙන් ඖෂධ පරිත්‍යාගයක්

එක්සත් ජනපදයේ ප්‍රමුඛ පෙළේ ජාත්‍යන්තර මානුෂීය සංවිධානයක් වන HOPE Worldwide විසින් අමෙරිකා ඩොලර් 2,740,498.32 (රුපියල් 1,017,958,100.964) ක් වටිනා හදිසි ඖෂධ ද්‍රව්‍ය, ශ්‍රී ලංකාවේ ජනතාවට වෙත පරිත්‍යාග කිරීමට පහසුකම් සලසා ඇත.

තානාපති මහින්ද සමරසිංහ මහතාගේ මගපෙන්වීම යටතේ වොෂින්ටන් ඩීසී හි ශ්‍රී ලංකා තානාපති කාර්යාලය විසින් කරන ලද ඉල්ලීමකට අනුව මෙම පරිත්‍යාගය හිමිව තිබේ.

ලොව පුරා සිටින දුප්පතුන්, රෝගීන් සහ දුක්විඳින අය වෙනුවෙන් සේවය කිරීමේ අරමුණින්, HOPE Worldwide 1991 දී පිහිටුවන ලදී. HOPE Worldwide, අවශ්‍යතා ඇති රටවල් සමඟ එකතුවී, ස්වේච්ඡා සේවකයන් සන්නද්ධ කිරීම, ආපදාවලට ප්‍රතිචාර දැක්වීම ආදිය සිදුකරන අතර ප්‍රජාවන් කෙරෙහි බලාපොරොත්තු ඇතිකර ඔවුන් ශක්තිමත් කරනු ලබයි. විපත් ඇති වූ කල්හි HOPE Worldwide ගෝලීය ස්වේච්ඡා සේවකයන්, පල්ලි සහ ආයතන හවුල්කරගනිමින් අවශ්‍ය සහන ලබා දෙයි.

HOPE Worldwide වෙතින් ශ්‍රී ලංකාවේ ජනතාව වෙත ලබාදෙන පළමු ආධාර තොගය මෙය වන අතර එහි Fluoxetine, Devenlafaxine Succinate ER, serotonin reuptake inhibitors (SSRIs) වැනි අත්‍යාවශ්‍ය ඖෂධ, hydroxychloroquine sulfate වැනි මැලේරියා නාශක සහ අධි රුධිර පීඩන ඖෂධ සහ Cartia XT සහ timolol maleate වැනි අත්‍යවශ්‍ය ඖෂධ අඩංගුවේ.

තීරණාත්මක කාලවලදී ඛේදවාචකයන්ගෙන් පීඩාවට පත් ප්‍රජාවන්ට උපකාර කිරීමට හැකි වන්නේ ශක්තිමත් හවුල්කාරිත්වයන් සහ පරිත්‍යාගශීලීන්ගේ නොමසුරු ආධාර තුළින් පමණක් බව HOPE Worldwide හි සභාපති සහ ප්‍රධාන විධායක නිලධාරී Dave Malutinok මහතා පැවසීය.

ජාත්‍යන්තර ආධාර සහ ඖෂධ සැපයුම් දිවයිනට ඉතා වැදගත් වන මොහොතක මෙම කටයුත්ත ශ්‍රී ලංකාවේ සෞඛ්‍ය අමාත්‍යාංශය සමඟ සහයෝගයෙන් ක්‍රියාත්මක වේ. ශ්‍රී ලාංකීය මහජනතාව ශ්‍රී ලංකා තානාපති කාර්යාලය සමඟ එක්ව, දෙනු ලබන ආධාර සහ කැපවීම පිළිබඳව HOPE Worldwide වෙත සිය හෘදයාංගම ස්තුතිය සහ කෘතඥතාව පළ කරනු ලබයි.