ආසියානු කුසලාන ක්‍රිකට් තරගාවලියේ සුපිරි සිව්දෙනාගේ වටයට ශ්‍රී ලංකාව, ඇෆ්ගනිස්තානය, ඉන්දියාව සහ පාකිස්තානය සුදුසුකම් ලබා තිබේ.
සුපිරි සිව්දෙනාගේ වටයට සුදුසුකම් ලැබු සියලු කණ්ඩායම් නැවතත් එකිනෙකා සමග තරගවදින අතර එම ප්‍රසාද ලකුණු සටහනේ පෙරමුණ ගන්නා කණ්ඩායම් දෙක අවසන් මහ තරගයට සුදුසුකම් ලබාගැනීමට නියමිතය.
ඒ අනුව සුපිරි සිව්දෙනාගේ වටයේ තරග ආරම්භ කරමින් පළමු තරගය ශ්‍රී ලංකාව සහ ඇෆ්ගනිස්තානය අතර (03) රාත්‍රීයේදී පැවැත්වුණි.
සාජාහිදී පැවැති තරගයේ පළමුවෙන් පන්දුවට පහර දුන් ඇෆ්ගනිස්ථානය නියමිත පන්දුවාර 20 අවසානයේදී කඩුලු 6ක් දැවී රැස් කළ ලකුණු සංඛ්‍යාව 175 කි.
ජයග්‍රහණය සදහා ලකුණු 176 ක ඉලක්කයක් හඹා ගිය ශ්‍රී ලංකා කණ්ඩායම පන්දුවාර 19 යි 1 පන්දුවක් අවසානයේ කඩුලු 6 ක් දැවී එම ඉලක්කය පසු කිරීමට සමත් විය.
ශ්‍රී ලංකාව සහභාගි වන මීළඟ තරගය ඉන්දියාව සමග ලබන 06 වැනිදා පැවැත්වීමට නියමිතය.
ආසියානු කුසලාන ක්‍රිකට් තරගාවලියේ සුපිරි වටයේ දෙවන තරගය අද පැවැත්වීමට නියමිතයි.
ඒ, ඉන්දීය කණ්ඩායම සහ පාකිස්ථාන කණ්ඩායම සමගයි.
එම තරගය ශ්‍රී ලංකා වේලාවෙන් අද රාත්‍රී 7.30ට ඩුබායි ජාත්‍යන්තර ක්‍රිකට් පිටියේදී පැවැත්වීමට නියමිතව තිබේ.
