ශ්‍රී ලංකාවේ 8 වැනි විධායක ජනාධිපති ලෙස රනිල් වික්‍රමසිංහ මහතා කෝට්ටේ පාර්ලිමේන්තු පරිශ්‍රයේදී දිවුරුම් දුන්නේය.
අගවිනිසුරු ජයන්ත ජයසූරිය මහතා ඉදිරියේ දිවුරුම් දීම සිදු කෙරිණි.
හය වරක් අග්‍රාමාත්‍ය ධුරයෙහි කටයුතු කර ඇති රනිල් වික්‍රමසිංහ මහතා විධායක ජනාධිපති ධුරයෙහි දිවුරුම් දෙන්නේ ප්‍රථම වතාවටයි.
මෙම අවස්තාවේ ජනාධිපතිවරයා දිවුරුම් දෙන අවස්ථාවේ පාර්ලිමේන්තු සංකීර්ණයේ විදුලිය විසන්ධි වීම සම්බන්ධව පරීක්ෂණ කිරීමට රහස් පොලිසියට බාර දී තිබේ.
8 වැනි විධායක ජනාධිපති ලෙස රනිල් වික්‍රමසිංහ මහතා දිවුරුම් දෙන අවස්ථාව ස්වාධීන රූපවාහිනිය මඟින් සජීවීව විකාශය කිරීමට නියමිතව තිබූ අතර සෙසු රූපවාහිනි නාලිකා මගින් සමගාමී විකාශයක් ලෙස ප්‍රචාරය කිරීමට නියමිතව තිබිණි.
ජනාධිපතිවරයා රතු පලස මතින් පාර්ලිමේන්තු සංකීර්ණයට ඇතුලු වීමෙන් පසු එම සජීවී විකාශය නැවතී ගියේය.
පාර්ලිමේන්තු සංකීර්ණයේ විදුලිය බිඳ වැටීමක් නිසා සජීවී විකාශය නතර වූ බවට පසුව වාර්තා විය.
රනිල් වික්‍රමසිංහ මහතා තම දේශපාලන ජීවිතයේ දී පාර්ලිමේන්තු ප්‍රජාතන්ත්‍රවාදය ඉතා ඉහළින් අගය කළ නායකයෙකු ලෙස ප්‍රකටය.
ජනාධිපති රනිල් වික්‍රමසිංහ මහතා සහ ජනාධිපති බිරිඳ මහාචාර්ය මෛත්‍රි වික්‍රමසිංහ මහත්මිය පාර්ලිමේන්තු සංකීර්ණයට පැමිණීමත් සමග අභිනව ජනාධිපතිවරයා වෙනුවෙන් හමුදා උත්තමාචාරයක් ද පිරිනැමී ය.
පාර්ලිමේන්තු සංකීර්ණයට පැමිණි රනිල් වික්‍රමසිංහ මහතා පිළිගනු ලැබුවේ, කතානායක මහින්ද යාපා අබේවර්ධන මහතා විසිනි.
අනුප්‍රාප්තික ජනාධිපතිවරයෙකු තෝරා පත් කර ගැනීම සඳහා ඊයේ (20) පැවති පාර්ලිමේන්තු ඡන්ද විමසීමේදී රනිල් වික්‍රමසිංහ මහතා මෙරට 08 වැනි විධායක ජනාධිපතිවරයා ලෙස තේරි පත්වූයේ, ඡන්ද 134 ක් ලබා ගනිමිනි.
නව ජනපති රනිල් වික්‍රමසිංහ මහතා පිළිබඳ සටහනක්…
1949 වසරේ මාර්තු මස 24 වනදා එස්මන්ඩ් වික්‍රමසිංහ මහතා සහ නාලිනි වික්‍රමසිංහ මහත්මියට දාව දෙවන පුතු ලෙස උපත ලැබූ රනිල් වික්‍රමසිංහ මහතා කොළඹ රාජකීය විදුහලේ ආදි සිසුවෙකි.
කොළඹ විශ්වවිද්‍යාලයෙන් උපාධිය සම්පූර්ණ කළ ඔහු පසුව නීතිඥවරයෙක් ලෙස දිවුරුම්දී දුන්නේ ය.
මෙරට දේශපාලන හා සමාජ වෙනස්කම් රැසකට මුලපිරූ 1977 මැතිවරණයේදී බියගම ආසනය ජය ගමිනින් පළමු වරට පාර්ලිමේන්තුවට පිවිසි රනිල් වික්‍රමසිංහ මහතා ජේ.ආර්. ජයවර්ධන ජනාධිපතිවරයාගේ කැබිනට් මණ්ඩලයේ සිටි ලාබාලතම අමාත්‍යවරයායි.
අධ්‍යාපන, තරුණ කටයුතු රැකී රක්ෂා හා කර්මාන්ත අමාත්‍ය ධුර දැරූ රනිල් වික්‍රමසිංහ මහතා ජාතික තරුණ සේවා සභාව බිහි කිරීමටත් නිදහස් වෙළඳ කලාප ඇරඹීමටත් පුරෝගාමී විය.
අධ්‍යාපන විද්‍යා පීඨ ඇති කිරීමට පුරෝගාමීව කටයුතු කළේ, වික්‍රමසිංහ මහතා අධ්‍යාපන අමාත්‍යවරයා ලෙස කටයුතු කළ කාල සීමාවේදීයි.
රනිල් වික්‍රමසිංහ මහතා 1994 දී එක්සත් ජාතික පක්ෂයේ නායකත්වයට පත්විය.
6 වරක් මෙරට අගමැති ධූරයට පත්වූ වික්‍රමසිංහ මහතා වසර 17 ක පමණ කාල සීමාවක් වරින් වර විපක්ෂ නායක ධුරය ද දරා තිබේ.
ඔහු කලක් පාර්ලිමේන්තුවේ සභානායකවරයා ලෙස ද කටයුතු කළේ ය.
