මාස දෙකකට ආසන්න කාලයක් දැඩි උණුසුම් කාලගුණයක් පැවති කොළඹ ඇතුළු ප්‍රදේශ රැසකට ඊයේ (12) පස්වරුවේ තද වැසි හැලුණා.
ගාල්ල, කෑගල්ල, රත්නපුර, කළුතර, ගම්පහ දිස්ත්‍රික්කවල ප්‍රදේශ රැසකින් ද තද වැසි වාර්තා වූ බවයි.
අද දිනයේ මේ දක්වා වැඩිම වර්ෂාපතනය කළුතර දිස්ත්‍රික්කයේ පාලින්ද නුවරින් වාර්තා වී ඇති අතර, එය මිලිමීටර් 113 යි දශම 5 ක් ලෙසයි සටහන් වුණේ. ගම්පහ දිස්ත්‍රික්කයෙන් මිලිමීටර් 110 ක වැසි වාර්තා වී තිබෙනවා.
මේ අතර උතුරු, උතුරු මැද, නැගෙනහිර සහ ඌව පළාත්වලත් හම්බන්තොට, නුවරඑළිය සහ මාතලේ දිස්ත්‍රික්කවලත් විටින් විට වැසි ඇතිවේ. උතුරුමැද සහ නැගෙනහිර පළාත්වලත් මාතලේ දිස්ත්‍රික්කයේත්, ඇතැම් ස්ථානවලට මි.මී 100 ක පමණ තද වැසි ඇතිවිය හැක.
සෙසු ප්‍රදේශවල සවස් කාලයේදී හෝ රාත්‍රි කාලයේදී තැනින් තැන වැසි හෝ ගිගුරුම් සහිත වැසි ඇතිවේ.
සබරගමුවසහ බස්නාහිර පළාත්වලත් නුවර, නුවරඑළිය, ගාල්ල සහ මාතර දිස්ත්‍රික්කවලත් ඇතැම් ස්ථානවලට මි.මී. 100 ට වැඩි තද වැසි ඇතිවිය හැක.
බස්නාහිර සහ දකුණු පළාත්වල වෙරළබඩ ප්‍රදේශවල උදෑසන කාලයේදීත් වැසි ඇති විය හැක.ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.
