ශ්‍රී ලංකා කෙටි ධාවන ශූර යුපුන් අබේකොන් ජාත්‍යන්තර මලල ක්‍රීඩා සංගමයේ මීටර 100 පිරිමි ඉසව්වේ නවතම ශ්‍රේණිගත කිරීම අනුව 46 වැනි ස්ථානයට පැමිණීමත් සමඟ ටෝකියෝ ඔලිම්පික් ක්‍රීඩා උළෙලට සුදුසුකම් ලැබීමට වැඩි ඉඩක් නිර්මාණය වී ඇති බව ශ්‍රී ලංකා මලල ක්‍රීඩා සංගමය පවසයි.
මෙවර ඔලිම්පික් පරිසාදන මට්ටම වන තත්පර 10 යි දශම බින්දුවයි පහේ සීමාව පසු කිරීමට සමත්ව ඇත්තේ ක්‍රීඩකයින් 39 දෙනෙකු පමණයි. යුපුන් අබේකෝන් මීටර් සියය ඉසව්වෙන් දක්වා ඇති දක්‍ෂතාව තත්පර 10 යි දශම බින්දුවයි 9 ක්.
ඔලිම්පික් ක්‍රීඩා උළෙලේ අවසන් ලැයිස්තුව මේ මස 29 වැනිදායින් පසුව සකස් කිරීමට නියමිතය.
මේ අතර ජපානයේ ටෝකියෝ නුවරදී ලබන ජූලි මස 23 වනදා ආරම්භ වන ඔලිම්පික් උළෙලට සහභාගිවීමට පැමිණි උගණ්ඩා කණ්ඩායමේ ක්‍රීඩකයෙකුට කොරෝනා වෛරසය ආසාදනය වී තිබෙනවා.
උගණ්ඩා කණ්ඩායමට ක්‍රීඩකයින් 9 දෙනෙකු ඇතුළත් වූ අතර ජපානයේ නරිටා ගුවන් තොටුපොලේදී ඔවුන්ට සිදුකළ පී සී ආර් පරීක්‍ෂණවලදී එක් ක්‍රීඩකයෙකු මෙලෙස ආසාදිතයෙකු ලෙස හදුනාගෙන තිබෙනවා.
එම උගණ්ඩා ක්‍රීඩකයා කොරෝනා එන්නත් මාත්‍රා දෙකම ලබාගෙන ඇති බවටයි විදෙස් මාධ්‍ය වාර්තා කළේ. ඔහු මේ වනවිට ස්වයං නිරෝධානයට යොමුකර තිබෙනවා.
