අත්‍යවශ්‍ය සේවා පිළිබඳ සඳහන් කරමින් තවත් අති විශේෂ ගැසට් නිවේදනයක් නිකුත් කර තිබෙනවා. ඒ, ජනාධිපති ගෝඨාභය රාජපක්ෂ මහතා විසින්. ජනාධිපතිවරයා එම අති විශේෂ ගැසට් නිවේදනය නිකුත් කර ඇත්තේ 1979 අංක 61 දරන අත්‍යවශ්‍ය මහජන සේවා පනතේ 2 වගන්තිය යටතේයි.
අදාළ එම ගැසට් නිවේදනයට අනුව, සීමාසහිත ලංකා සතොස, සමූපකාර තොග වෙළෙඳ සංස්ථාව, ආහාර කොමසාරිස් දෙපාර්තමේන්තුව, සමූපකාර සංවර්ධන දෙපාර්තමේන්තුව සහ සමුපකාර සමිති මගින් ඉටුකරනු ලබන සියලුම සේවාවන් හා තවත් ආයතන කිහිපයක් අත්‍යවශ්‍ය සේවා ලෙසයි නම් කර ඇත්තේ.
මේ අතර සෞඛ්‍ය සේවයට අදාළව ඉටු කළ යුතු වන්නාවූ හෝ අවශ්‍ය වන්නාවූ කවර වුව ස්වභාවයේ සියලුම සේවාවන්, වැඩ හෝ ශ්‍රම දායකත්වය ද අත්‍යවශ්‍ය සේවා ලෙස ගැසට් කර තිබෙනවා.
සියලුම සතොස අළෙවිසල් අද (03) සිට අඛණ්ඩව විවෘත තැබීමට තීරණය කළේ යැයි සතොස සභාපති, රියර් අද්මිරාල් ආනන්ද පීරිස් මහතා පවසයි.
වෙළෙඳ අමාත්‍ය ආචාර්ය බන්දුල මහතාගේ උපදෙස් පරිදි සතොස විවෘත කරමින් ජනතාවට සහන සැළසීමට තීරණය කළ බවත් තොග සහ සිල්ලර ලෙස භාණ්ඩ අළෙවිය කරන බවත් ආනන්ද පීරිස් මහතා කියයි.
බලපත්‍රලාභී ග්‍රාමීය කඩවලට සීමිත තොග ද, අළෙවිසල්වලට පැමිණිය හැකි පාරිභෝගිකයන්ට සිල්ලර අළෙවි කරන බවත් රුපියල් දහසේ මලු ඕනෑම කෙනෙකුට ලබාගත හැකි බවත් සභාපතිවරයා කීය.
සභාපතිවරයා පැවසුවේ දිස්ත්‍රික් සහ ප්‍රාදේශීය ලේකම්වරුන්ට සහ ප්‍රාදේශීය දේශපාලඥායන්ට ජනතාවට බෙදාදීමට අවශ්‍ය රුපියල් දහසේ මලු ලබාදීමට ද සතොස සේවකයන් සූදානමින් සිටින බවත්ය.
