හම්බන්තොට මහින්ද රාජපක්ෂ ක්‍රීඩාංගණයේ ඊයේ පැවැති තරගාවලියේ 9 වැනි තරගයෙන් ගෝල් ග්ලැඩියේටර්ස් පිල කඩුලු 5කින් පරාජය කළ ජැෆ්නා පිල මේ තරගාවලියේදී පිට පිට ලබාගත් සිව්වැනි ජය මෙයයි.
ලංකා ප්‍රිමියර් ලීග් තරගාවලියේ අපරාජිත බව තව දුරටත් රැක ගැනීමට තිසර පෙරේරාගේ නායකත්වයෙන් යුත් ජැෆ්නා ස්ටැලියන්ස් කණ්ඩායම සමත් වෙයි.
තරගයේ කාසියේ වාසිය දිනාගත් ජැෆ්නා කණ්ඩායමේ ආරාධනයෙන් පළමුව පන්දුවට පහර දුන් ග්ලැඩියේටර්ස් කණ්ඩායම කඩුලු 6ක් දැවී ලකුණු 170ක් රැස් කළ අතර, එම ඉලක්කය හඹාගිය ජැෆ්නා පිල පන්දු 2ක් ඉතිරිව තිබියදී ජය හිමිකර ගත්තේ කඩුලු 5ක් පමණක් අහිමි කර ගනිමිනි.
මේ දෙපිල මින් පෙර හමු වූ තරගයේදීත් විශිෂ්ට ඉනිමක් දියත් කරමින් තරගයේ වීරයා වූ අවිශ්ක ප්‍රනාන්දු ඊයේ සිය දෙවැනි අර්ධ ශතකය රැස් කරමින් ජැෆ්නා කණ්ඩායමේ ජයග්‍රහණයේ නියමුවා විය.
