ශ්‍රී ලංකාවේ විශ්‍රාමික රාජ්‍ය සේවකයින්හට වාර්ෂිකව ලබා දෙන නිදහස් දුම්රිය බලපත්‍ර සඳහා ආසන වෙන් කිරීමේ දී මෙතෙක් පැවැති ක්‍රමය වූයේ අදාල ප්‍රදේශයේ ග්‍රාම නිලධාරි ගේ නිර්දේශය මත හා ප්‍රාදේශීය ලේකම් ගේ අනුමැතිය මත දුම්රිය දෙපාර්තමේන්තුව විසින් එම ප්‍රවේශ පත්‍ර නිකුත් කිරීමයි.
මෙම දීර්ඝ පටිපාටිය නිසා විශ්‍රාමික රාජ්‍ය සේවකයින්ට මහත් අපහසුතාවයකට මුහුණ පෑමට සිදුවීම හේතුවෙන් එම තත්ත්වය තුරන් කර දුම්රිය ආසන වෙන් කිරීමේ කටයුතු මාර්ගගත ක්‍රමයට හෙවත් Online ක්‍රමයට සිදු කර ගැනීමේ පහසුකම් ලංකා දුම්රිය දෙපාර්තමේන්තුව විසින් ආරම්භ කරනු ලැබීය.
කොළඹ කොටුව දුම්රිය ස්ථානයේ දී එම සේවාව අද දින ආරම්භ කරන ලද්දේ ප්‍රවාහන කළමනාකරණ, විදුලිබල හා බලශක්ති අමාත්‍ය මහින්ද අමරවීර මහතාගේ ප්‍රධානත්වයෙනි. එම අවස්ථාවට රාජ්‍ය පරිපාලන අමාත්‍ය ජනක බණ්ඩාර තෙන්නකෝන් හා රාජ්‍ය අමාත්‍ය ලසන්ත අලගියවන්න යන මහත්වරු ඇතුලු පිරිසක් සහභාගි වූහ.
මේ වනවිට කොළඹ කොටුව දුම්රිය ස්ථානයේ ආසන කල් තියා වෙන් කරවා ගැනීම මෙන්ම තොරතුරු ලබා දීම සඳහා වන කරුණු කාර්යක්ෂම කර තිබේ. විශ්‍රාමික රාජ්‍ය සේවකයින් විසින් මෙතෙක් මුහුණ දී සිටි දුම්රිය ආසන වෙන් කරවා ගැනීමේ එම ගැටළුව අවසන් කිරීමට පියවර ගෙන තිබෙන අතර ගරු ජනාධිපතිතුමන්ගේ අපේක්ෂාව වන්නේ රටේ ජනතාවට සේවාවන් ලබා ගැනීමේ දී ඒවා සංකීර්ණ තත්ත්වයට පත් කිරීම නොව සැහැල්ලු හා සරළ ක්‍රමයට එම සේවාවන් මහජනතාවට ලබා ගැනීමේ පහසුකම් පුලුල් කිරීම බව අමාත්‍යවරයා මෙහිදි කියා සිටියේය.
ඒ අනුව මේ වනවිට ආයතනගත සේවාවන් ඉතාමත් කාර්යක්ෂම හා සරළව ඉටු කර ගැනීමට විද්‍යුත් උපාංග සවි කරමින් රාජ්‍ය සේවාව නවීකරණය කිරීම අරඹා ඇතැයි ද අමාත්‍යවරයා සඳහන් කළේය
මෙම අවස්ථාවට ප්‍රවාහන අමාත්‍යාංශයේ ලේකම් ගාමිණි සෙනවිරත්න මහතා ඇතුලු පිරිසක් සහභාගි වූහ.
